Alislaam.com – Zulu
Ukuthenga Umhlaba Ukuze Kwandiswe IMasjid Engcwele
Ngelinye ilanga uRasullullah (sallallahu alayhi wasallam) waya komunye umuntu wase ethi kuye, “Ungakwazi ukungidayisela umuzi wakho ukuze ngandise indawo yeMasjid eduze kweKa’bah futhi umvuzo walesenzo sakho esihle ngikuthembisa indlu yobukhosi eJannah (kuchaza ukuthi ngaphandle kwalemali ozoyithola endaweni yomuzi)?”
Lomuntu waphendula wathi, “O Rasullullah (sallallahu alayhi wasallam), ngifunga ngoAllah ukuthi iwona umuzi enginawo kuphela, uma ngiwudayisela wena ngizohlala kephi nezingane zami la eMakkah Mukarramah.”
URasullullah (sallallahu alayhi wasallam) waphinda wamkhuthaza futhi ethi, “Naphezu kwalokho okushoyo, ngidayisele umuzi wakho, ukuze ngandise indawo yeMasjid eduze kweKa’bah endaweni yalesenzo sakho esihle ngikuthembisa indlu yobukhosi eJannah.” Lomuntu wase ephendula ethi, “Ngifunga ngoAllah, anginayo inhloso yokudayisa umuzi wami.”
UHadrat Uthmaan (radiyallahu anhu) wase ezwa ukuthi kade kwenzekani. Wase ehamba eya kulomuntu okade engumngane wakhe ngaphambili kokuthi kufike iIslaam wase ethi kuye, ngizwile ukuthi uRasullullah (sallallahu alayhi wasallam) kade enenhloso yokuthenga umuzi wakho ukuze andise indawo yeMasjid eduze kweKa’bah futhi wase ekuthembisa endaweni yalesenzo esihle umuzi wobukhosi eJannah wena wase wangavuma.” Lomuntu wase ephendula ethi, “Yebo angivumanga.”
UHadrat Uthmaan (radiyallahu anhu) wase ephinda emkhuthaza ukuthi akadayise umuzi wakhe waze wavuma, wase uHadrat Uthmaan (radiyallahu anhu) emkhokhela imali ekade ilanganiswe ezinhlamvwini eziwu (10 000) ezegolide.
UHadrat Uthmaan (radiyallahu anhu) wase wahamba waya kuRasullullah (sallallahu alayhi wasallam) wase ethi kuye, “Ngizwile ukuthi kade unenhloso yokuthenga umuzi kasabani bani ukuze wandise indawo yeMasjid eduze kweKa’bah futhi wase uthembisa umnikazi womuzi indlu yobukhosi eJannah. Umuzi usungowami ngoba sengiwuthengile kumnikazi, uzowthatha kimi mahala kodwa endaweni yawo ungithembise indlu yobukhosi eJannah?“
URasullullah (sallallahu alayhi wasallam) wavuma wase ewuthatha lomuzi kuUthmaan (radiyallahu anhu) emthembisa indlu yobukhosi eJannah futhi wase enza amaSahaabah ofakazi balokho.
