Alislaam.com – Zulu
Ukwamukelwa kwe-Dua ka-Hazrat Sa’eed bin Zaid (radhiyallahu ‘anhu)
Ngelinye ilanga , u-Arwa bint Uwais, umakhelwane ka-Hazrat Sa’eed bin Zaid (radhiyallahu ‘anhu), weza ku-Muhammad bin ‘Amr bin Hazm (rahimahullah) enesikhalazo ngomakhelwane wakhe, u-Hazrat Sa’eed bin Zaid (radhiyallahu ‘anhu).
Wathi u-Hazrat Sa’eed wakha udonga lwakhe endaweni yakhe, wabe esecela u-Muhammad bin ‘Amr (rahimahullah) ukuba aye kuye ayokhuluma naye egameni lakhe. Waphinde wathi, “Ngifunga ngo-Allah Ta’ala, uma u-Hazrat Sa’eed bin Zaid (radhiyallahu ‘anhu) engayibuyiseli into engifanele, ngizomemezela obala ukungabi nabulungiswa akwenze kimi phambi kwabantu bonke e-Masjid ka-Rasulullah (sallallahu ‘alaihi wasallam).”
U-Muhammad bin ‘Amr bin Hazm (rahimahullah) wamxwayisa wathi, “Ungamlimazi umngane ka-Rasulullah (sallallahu ‘alaihi wasallam) (ebhekisela ku-Hazrat Sa’eed bin Zaid (radhiyallahu ‘anhu)). Akuyena umuntu ozokucindezela noma aphange amalungelo akho.”
Edanile ngempendulo yakhe, u-Arwa wahamba waya ku-‘Umaarah bin ‘Amr no-Abdullah bin Salimah (rahimahumallah), wabatshela ngesikhalazo sakhe. Ngenxa yesicelo sakhe, baya ku-Hazrat Sa’eed bin Zaid (radhiyallahu ‘anhu) owayesendaweni yakhe e-‘Aqeeq. Lapho ebabona, wababuza wathi, “Nize ngani lapha?” Bamtshela ngesikhalazo sika-Arwa kanye nesicelo ayebenze sona. UHazrat Sa’eed bin Zaid (radhiyallahu ‘anhu) waphendula wathi, “Ngizwe uRasulullah (sallallahu ‘alaihi wasallam) ethi, ‘Noma ubani othatha impahla yomunye umuntu ngokungemthetho, noma ngabe kungakanani okulingana nobubanzi besandla (i-Shibr), uzofika ngosuku lweKiyaamah nalolo kiphi lomhlaba luboshwe entanyeni yakhe, kanye nezingqimba eziyisikhombisa zomhlaba ezingaphansi kwalo.’”
Ngemuva kwalokho, wathi, “Akafike azothatha noma yimuphi umhlaba wami ewufuna ngokungafanele athi ngowakhe.” Wabe eseqalekisa ethi, “O Allah, uma eqamba amanga ngalokho ekusho ngami, ungamvumeli ukuba afe ngaphambi kokuba ususe ukubona kwakhe futhi umenze afele empahleni yakhe (noma emthonjeni wayo, ngokwalokho okushiwo kwenye indaba).” Waphinde wenza i-Dua yokuthi uAllah Ta’ala enze iqiniso libonakale kumaMuslim.
Kwezinye izindaba ezilandiswayo, kukhulunywa ngokuthi uHazrat Sa’eed bin Zaid (radhiyallahu ‘anhu) wathi, “Ngifunga ngo-Allah Ta’ala, sengike ngamnika ama-ziraa’ (iskalo so mhlaba) fangamakhulu ayisithupha omhlaba wami ngenxa yesimangalo samanga ayesenze ngami. Ngamnika lokhu okuvela empahleni yami ngenxa yehadith engayizwa ngqo kuRasulullah (sallallahu ‘alaihi wasallam).” Wabe esecaphuna leyo hadith eshiwo ngenhla.
Ngemva kwalokho u-Arwa weza kuye wathatha ingxenye yomhlaba wakhe lapho ayekhe khona udonga lwakhe. Wabe esebhidliza udonga olwalwakhiwe nguye, wakha indlu yakhe kulo mhlaba.
Ngemva kwesikhathi esifushane, indawo yonke yase-‘Aqeeq yahlaselwa yizikhukhula ezinamandla ezingakaze zibonwe ngaphambili, okwenza ukuthi umngcele phakathi kwalezi zindawo zombili ubonakale ngokucacile. Kwakuyileso sikhathi lapho isimangalo sakhe samanga sembuleka khona phambi kwabantu, futhi iqiniso likaHazrat Sa’eed bin Zaid (radhiyallahu ‘anhu) labonakala kubo bonke.
Ngenyanga eyodwa kamuva (ngemva kwezikhukhula), u-Arwa bint Uwais walahlekelwa ukubona kwakhe waba yimpumputhe. Kungakapheli sikhathi eside ngemva kwalokho, ngenkathi ehamba endaweni yakhe ngobusuku obubodwa, wawela emthonjeni wakhe wabe eseshona. Ngale ndlela, iziqalekiso zikaHazrat Sa’eed bin Zaid (radhiyallahu ‘anhu) ngaku-Arwa zagcwaliseka.
U-Abu Bakr bin Muhammad bin ‘Amr bin Hazm, omunye wabalandisi bale ndaba, uthi, “Ngesikhathi sisencane, uma kuvela ingxabano phakathi kwabantu ababili, kwesinye isikhathi sasizwa umuntu eyodwa etshela omunye ukuthi, ‘Kwangathi u-Allah Ta’ala angakwenza impumputhe njengoba enza u-Arwa impumputhe.’ Sasivame ukucabanga ukuthi mhlawumbe umuntu oqalekisayo wayesho isilwane esibizwa ngokuthi u-Arwa (imbuzi yezintaba). Nokho, kamuva sathola ukuthi la mazwi kwakungamazwi kaHazrat Sa’eed bin Zaid oqalekisa u-Arwa bint Uwais, okwathi ngenxa yalokho walahlekelwa ukubona kwakhe. (Siyarul A’alaamin Nubalaa 1/106, Hilyatul Awliya 1/97)
